ولونى اشك .. و حاسة انك تمام .. عمال تنحنح كدة و تموت و تصحى انت والمودام ومحدش فاهملكوا حاجة !
انت لما سبت الحكم .. المفروض حسب الدستور القديم ان كان رئيس المحكمة الدستورية او رئيس مجلس الشعب هو الى يمسك الحكم
وبما ان الشعب مضحوك عليه سنين و مش ناقص و نسبه الجهل والسطحية كبيرة .. و ده مش غلط فى حد دى الحقيقة .. وكمان احنا يا جماعة منعرفش حاجه اوى عن الجيش ولا عن العسكر معلومات الشارع مش كتير عنهم
واستغليت هتاف الناس " الشعب و الجيش .. ايد واحدة"
الشعب والجيش ايد واحدة لان الناس كل فكرتها عن الجيش ان دول الى حاربوا فى 73 و رجعولنا ارضنا و كل واحد فى عيلتنا لازم عنده حد فى الجيش ده انا لو عندى ولدين هيبقى ابنى الكبير فى الجيش .. يعنى الجيش ده مقدر و مكتوب على كل عيلة
وغلطـــان السنين الى يخلط مابين الجيش .. و قيادات الجيش بما فيهم المجلس العسكرى .. ويتكلم على انه الجيش المصرى
و غلطان الى يعتبر نقد المجلس العسكرى هو نقد للجيش .. المجلس العسكرى هو حاكم البلاد حاليا و هو فى منطقة السياسة و السياسة متعرفش ياما ارحمينى خصوصا انهم فى اديهم مفتاح القرارات كلها
يعنى من الاخر الى بينتقد المجلس العسكرى مش خاين زى ما ناس الله يكرمها بتقول كده
و كمان يعنى بالعقل كده حسنى مبارك كان فى ايه فى عهدة كويس ؟ كان فى منصب مهم فى البلد الى ماسكه حد مشهودله بالنزاهة ؟
ده حتى جودت الملط الى خلاص كلنا كنا فاكرينه ملاك ... طلع مياه من تحت تبن ! ..
ازاى عقلك يخيلك ان المؤسسة العسكرية بجلالة قدرها .. مبارك نسى يسيب بصمته فيها ... ازاى
بل بالعكس بقا خدوا النقطة دى
.. ده احنا تحت حكم العسكر .. يعنى ربما تكون المؤسسة العسكرية قياداتها اخطر بكتير من مبارك لان مبارك مجرد ممثل ليها فى الحكم العسكرى للبلاد .. انتوا متخيلين هول الفاجعة ؟؟
محدش فينا احنا عامة الشعب .. يقدر يتكهن المؤسسة دى ايه الى بيحصل فيها .. كل الى نعرفه ان حكم العسكر القمعى ماسك مصر بقاله ستين سنة ناحرها خالص فيها من ايام جمال عبد الناصر
وكل فترة حكم جديدة بتثبت فشلها عن الى قبلها
واحنا زهقنا بقا .. واتفلقنا .. عايزين مصر مدنية جميلة كدة ..اييييه فى ايييه ده لو كانت فضلت ملكية كانت بقت ارحم يا سااااتر !!
يعنى من الاخر كدة مبارك ده مش حاجة الا انه واحد تبع العسكر كأنهم مفوضينه فى الوجهة يمثل المؤسسة العسكرية فى الحكم زى الى قبله بالظبط .. بس طبعا اكيد السادات كان ارحكم من مبارك بكتير
وجدير بالذكر ملف التوريث الى كان بيحصل فيه مشاكل و بيقال ان المؤسسة العسكرية كانت رافضة جمال مبارك يعنى جاتلهم على الطبطاااب
يعنى بردو نفهم من كدة ان لو المؤسسة العسكرية فى مصر كان قلبها على مصر بجد مكانوش سكتوا على مبارك 30 سنة او 20 سمة عشان اكون عادلة لان مبارك فساده بدأ بعد ما تولى الحكم بكذا سنة ... اممم
طب انتوا مش ملاحظين ان ال20 سنة دول مين كان وزير الدفاع فيهم ؟؟
هو وااااحد متغيرش
مين ؟؟؟
ايوة هو ده
بالظبط هو الى مبارك عينة رئيس للبلاد الفترة دى و رئيس المجلس الاعلى الى بيحكمنا
و بصراحة انا يحززز فى نفسى ان امريكا و اسرائيل تشيد بالمجلس الاعلى عشان احنا عارفين هما بيفكروا ازاى
والله العظيم كانت طايرة بيهم و ما زالت
ومريحنها جدا بدليل موضوع نبيل العربى الى محدش فى مصر هينساه
ومحدش عدى عليه المقلب الى حصل ده بالساهل كده
و ممكن ترجعوا للتدوينة الى انا كتبتها من فترة هنا فى المدونة .. عشان تعرفوا ان القرارات زى ما ابراهيم عيسى قال .. هبطت علينا من فوق .. من غير ما حد يعرف ولا حتى يبقى عندنا فكرة الا قبلها بساعتين ولا حاجة يعنى قمة العيب والله فى حق الشعب المصرى ... وطبعااا هو اتشال عشان هو تاعب اسرائيل اوى فى تصريحاته .. حاجة متخيلش على عقل عيل عنده 10 سنين
عندنا كذا نقطة هنتكلم فيها و منها هنطلع بحاجة مهمة جدا لازم مصر كلها تعرفها و مهمة كل القوى الوطنية و السياسية هى نشر الوعى والفكرة دى عن الناس عشان نتجمع كلنا من تانى على مطلب واحد الا وهو
اسقاط النظام العسكرى .. متخافوش اوى كده محدش بيموت ناقص عمر و مصر محميا بمشيئة الرحمن لا المجلس ليه فضل ولا لو مشى مصر حتنهار يعنى الكلام ده بيضحكوا بيه علينا
--------------------
النقطة الاولى بالترتيب كدة : ( الجيش حما الثورة و الثوار )ا
اااااااااى كلام .. اى كلام بيتقال و محدش فاهم حاجة ... والى كانوا فى الشارع 20 مليون بالكتير اوى فى كل المحافظات .. يعنى 60 مليون واحد قاعدين فى البيت .. قول منهم 35 40 مليون واحد كبير و مدرك .. سهل جدا ان المجلس يلعب عليهم .. احنا حمينا الثورة و حمينا الثوار فى الميدان ويطلع ممدوح شاهين يقولك كمان احنا لولانا كان زمانا بقينا زى ليبيا .. والناس عادى جدا تصدق حتى لو هما مع الثورة و بيدعموها و مع اسقاط النظام مكانوش قاعدين فى البيت يعنى معارضين ..هما شايفين ثورة محترمة خلصت فى 18 يوم بسسس وكل الى حوابينا ماشاء الله شهور ولسه مش عارفين يسقطوا النظام .. ده غير ان فى ناس كتير فى مصر فاكرة ان النظام هم مبارك و الكام واحد الى اتمسكوا دول بس .. يعنى المجلس معاه الوتر الحساس الى يقدر يلعب بيه فى عقول الناس مالآخر .. وطبعا الكلام ده غلط
ايه رأيك يا فندم ان المجلس لا حما الثورة ولا حاجة .. نستعرض الصورة كده من الاول ؟
فى الاول كانت الشرطة بتقمع المتظاهرين و بتموتهم لان هى واخدة على الغشومية ماشاء الله .. مبارك لقا ان الكلام ده مش نافع والثوار متماسكين
الو .. ايوة يا طنطاوى .. اتدخل
قام الجيش نازل .. ماهى خطط بديلة بقا انتوا فاكرينهم هبل ؟
المهم الجيش نزل و فضلت الناس تسقف الجيش والشعب ايد واحدة و قلت فوق اوى ليه هما بيقولوا كده .. والشرطة خلاص انسحبت تماما ! عايزة اقولكوا ان مبارك لما لقا الموضوع اكبر منه و سحب الشرطة تماما ادرك هو و المؤسسة العسكرية ان مافيش حل غير ان مبارك يختفى من الصورة وقالوا بس يحاولوا كام محاوله كده مره خطابات استعطاف مرة بلطجية مرة اجندات مرة سليمان كده يعنى ولو منفعش خلاص هيختفى مجتش عليه بسسسس بشرط .. ميتحاكمش !.. اه
الجيش لما نزل كان واقف و قايم بدور المتفرج فقط .. محايد ..
فى موقعة الجمل الجيش فتح الطريق للبلطجية او على الاقل متدخلش لحماية المتظاهرين منهم .. والى كان فى المادين شاف و عارف و الى مكانش فى الميدان ساعتها جاله الكلام من كل الناس
وانا واحدة مكانتش فى الميدان ساعتها و جالى الكلام من ناس كتير و منهم معارفى اوى يعنى مش هيحوروا عليا !!
شوفواااا الفديو ده شوفوا بيقولوا ايه على الجيش و شوفوا ظابط الجيش الى عدى جمبهم و هما واقفين ولا كأنه شاف حاجة
http://www.youtube.com/watch?v=EW-gXXZlxi0 مكانش دايما بيجلهم اوامر بالتصدى و حماية المتظاهرين .. لو فاكرين صورة النقيب ماجد بولس الى كان بيعيبط فيها .. اسد التحرير .. كان بيعيط ليه ؟ عشان مكنش جايلهم اوامر بحماية الثوار و كان الظباط الى فى التحرير بيحموا المتظاهرين ساعات من نفسهم من غير اوامر
المرة الى الطيارات طارت فوق الميدان و الدبابات كانت مصوبة المدافع ناحية الميدان عشان يسفلتوه .. ايه بقا ؟
الظباااااط الى فى الشارع .. رفضوا الضرب .. مش تقولى بقا المجلس .. لو المجلس هو الى رفض الضرب كانوا وقفلوا لمبارك اول ما ادى الامر ومكنش اصلاااا الامر وصل للى فى الشارع و الاستعدادات تمت .. احنا مش هبل ولا بنريل لامؤاخذة .. وشوفوا ده .. طبعان هو بيقول من الرئاسة الى هو يعنى عدت من تحت ايد المجلس ومخدوش بالهم ؟ هو شكلة مش فاهم حاجة بس هو ده و غيره اخواتنا وجيشنا
http://www.youtube.com/watch?v=tjo5zNDZbT8 فواحد كان مستعد انه يقضى على الناس فى التحرير فجأة اتنحى .. او تخلى ! .. ازاى ؟؟ اكيييد فى صفقة حصلت مقابل عدم محاكمته او محاكمته صوريا او محاكمته حتى محاكمات خفيفة .. وراجعوا كلامى فوق عن الحكم العسكرى بردو
و ليه اتاخروا 18 يوم عشان يتنحى ؟ مهما لو قلبهم علينا اوى كانوا زحلقوة من بدرى شوية .. ده ان مكانوش المفروض ينقلبوا عليه من زماااان ويخلصونا من فساده .. الفكرة كلها تتلخص فى ان فى الاواخر الظباط الى فى الميدان بدأوا ينضموا للمتظاهرين ( لو فاكرين احمد شومان و كلامه وادى الفديو بتاعه شوفوا قال ايه على المشير
http://www.youtube.com/watch?v=6ft3YhEShfs http://www.youtube.com/watch?v=1cVlhONh7UI فلما هما لقوا الظباط حتى خلاص هينقلبوا و فى كتير اوى انضموا للمتظاهرين اضطروا لاخفاء مبارك مقابل الصفقة الى تمت
كدة انا عملت الى عليا اوووووى فى موضوع حماية الثورة والى الدلائل قدمتها والله اعلم
----------------------------------------
النقطة الثانية : المحاكمات لرموز النظام السابق
بعد ما مبارك اتشال خلاص و بدأت بقا الناس تنضف الميدان وفى ناس كانت مصممة تمشى حكومة احمد شفيق و فى كمان ناس بس مش كتير كانوا طالبين مجلس مدنى/عسكرى .. فضلوا معتصمين فى الميدان فترة
المجلس الاعلى طبعا تعهد بقا انه هينفذ مطالبنا ( عند والدته لؤاخذة ) و عملوا صفحة على الفايس بوك للتواصل معانا والحياة بقت بمبى اوى ماشى حلو
وبعدين ؟
خير يعنى احمد شفيق بيعمل ايه ؟
فضلنا على الحال ده بتاع 20 يوم
المهم قعدنا نزن جامد جدا و الناس تنزل التحرير وكان فى ناس اصلا معتصمين زى ما قلت
لحد ما احمد شفيق طلع على اون تى فى الحلقة الى كلنا عارفينها مع علاء الاسوانى وقااال بعضمة لسانه ""ان المجلس هو الى قاله لا خليك لما راح قدم استقالته احنا عايزينك او حاجة بنفس المعنى ""
و مع انى مش بحب احمد شفيق لكنى مصدقاة فى النقطة دى لانه مش هيتبلى على المجلس الاعلى .. ومن ساعتها و هى عملت صدى صوت فى دماغى الكلمة دى .. اتجننت
تانى يوم بالظبط احمد شفيق قدم استقالته و المجلس قبلها انا أتأكدت انه هو الى قدمها على حسب بيان المجلس الاعلى رقم 26 ..
ومن بعدها بقا و اتذلينا ذل الإبل عشان الرموز بقا تتحاكم
وكان اول ناس اتاخدت الرباعى المرح و اول واحد اتحاكم هو العادلى الغبى ههههه والله غبى عشان الباقى طلع انصح منه وهو بقا كبش فدا وبس و ياريته حتى اتحاكم على قتل المتظاهرين ولا كنيسة القديسين ده اتحاكم فى البلاعة " الكسب الغير مشروع "ا
عشان مطولش عليكوا .. انتوا عارفين الاحداث الى حصلت و المليونيات الى اتعملت كل جمعة عشان قالن ضغغغغغغغغط و نجمع توقيعات عشان نحاكم الثلاثى المرح هههههههههه توقيعااات
بنشحت احنا
بنطلب جاجة مش من حقنا و مستنين المجلس و النائب العام يمنوا علينا
ياخى تيــــــــــــت بقا .. حرقة دم يعنى
المهم فضلنا على الحال ده لحد ما الثلاثى اتمسك ( طبعا بعد ما ظبطوا كــــل ورقهم احنا مش هبل )
ودخلوا بردو فى البلاعة مش فى تهم تانية و بيطلعوا اهم ولما بنتضايق بيدخلوهم شويه هههههههههه مهزلة وربنا المعبود مهزلة
اما الخرتيت الكبير مبارك .. فكان قاعد فى شارم الشيخ فى المنتجع اكتر من شهر او قرابة شهرين ... انتوا متخيلين ؟؟ حاسيــــــن بالمهزلة ؟؟
طب ده كان قاعد ليه كـــل ده ؟؟ هاه ؟
اكيد عارفين يعنى
متمسك الا لما قالو فى 1800 اوتوبيس جاهزين و هنطلع على شرم نجيبه بقا
وياريته اتمسك .. بقاله شهرين تانين قاعد فى مستشفى سبع نجوم هههههه
يعنى قمّة القرطسة العلنى .. وقلة الادب فى حقنا و حق الى ماتوا و اتصابوا
وكل شوية بقا .. اه يا قلبى اه يا مش عارف ايه .. ومراته اه يا قلبى .. حالتها تعبانه .. مبارك بيعيط .. انتوا هتحبسونى ؟
مرة قالوا مبارك كان ماسك فى السرير و مرة قال اعملوا فيا الى انتوا عايزينه بس سيبوا ولادى هههههههههههه خدوا كل حاجة ورجعولى ثروتى هاها
والمفروض بقا اننا نصاااادق و الى يتعاطف معاه و الى يحس ان التحقيقات ماشية تمام فعلا
وطبعا محدش عارف مين اللذيذ الى بيسرب المعلومات دى للصحافة
والى تطلع بكفالة و بتاع انتوا بقا عارفين الاخبار الى كنا بنسمعها اليومين الى فاتوا الى تشلّ الواحد
كدة استهبال علنى ... و المجلس يقولك اصل احنا ملناش دعوة بالمحاكمات .. لا يا راجل ! وهو النائب العام يقدر يتصرف من مزاجة كده ؟ واصلا النائب العام ده مع نفسهههه .. كان فين ده ايام مبارك ؟؟ مين ده اساسا .. حد ضامنه ؟؟
ده غير ان فى الاعلان الدستورى المادة رقم 56 النقطة التاسعة :
العفو عن العقوبة أو تخفيفها أما العفو الشامل فلا يكون إلا بقانون
ايه بقا ؟؟؟؟؟؟؟؟ هاه ؟؟ يعنى فى حاجة فى اديكوا اهو !
اعتقد كلنا عارفين موضوع المحاكمات ده انا رغيت فيه كتيير اوى كفاية كدة انتوا فاهمين الى انا عايزة اوصله
---------------------
ثالث نقطة : نبيل العربى الى اتزحلق و انا اتكلمت فى المقدمة فوق و كاتبة موضوع عنه فى المدونة و كله اعتقد عارف الموضوع
---------------------
رابع نقطة : الانفلات الامنى و الفتنة الطائفية
بقالنا ياربى كام ؟ 4 شهور فى انفلات امنى ؟ هو احنا مركبين ارايل كاوتش .. انا لو ماسكة البلد كان زمانى رجعت الامن فيها فى اسبوع بالكتير وربنا ما بهزر .. مش عيب على شنباتكوا مش عارفين تنزلوا كام ظابط ؟
لاااااا .. بينزلوا .. بس وقت مانتوا تعوزوا يعنى طظ فى الشعب
يعنى الامن المصرى بيحمى النظام و ثورة مضادة
فاكرين فى الميدان لما الظباط الى نزلوا يوم 8 ابريل ؟ فاكرين كم الاستعدادات الى تمت عشان يمسكوهم ؟
طيارات الصبح تصور
واول ما الناس تقل فى الميدان هجوم .. امن مركزى .. ظباط جيش .. شرطة عسكرية .. تلات سبعات الى هى قوات مكافحة ارهاب .. كام مدرعة ؟
ايـــه يابا ؟ فى ايه
ليييه كل دة ؟
للدرجادى خايفين الناس تعرف الحقيقة ؟؟
مش موضوعنا ... الموضوع هو ان انتوا لما بتبقوا عايزين تأمنوا حاجة و تسيطروا على حاجة بتعرفوا
السفارة الاسرائيلية هاه ؟؟ عملتوا عندها ايه ؟؟
دى موضوعها موضوع لوحدها هنتكلم عنة فى نقطة خاصة
ودة فديو ليييكوا يالا بقا :
http://www.youtube.com/watch?v=EOh7BWqSr8E&feature=related http://www.youtube.com/watch?v=rEqUalA-58w&feature=related شوووووووووووووفوا العدد !!!!!!
لكن كنيسة تولع .. حد يهجم على اعتصام سلمي .. بلطجية .. لا مش اختصاصكوا ده انتوا اختصاصكوا مش حماية مواطن .. حماية فساد
بس انتوا طلعتوا اى كلام والله ... الداخلية على قياداتها عالى ماسكين البلد .. اخــــــــــص
-------------------------------
خامسا : بيانات المجلس و الكدب العلنــــى
فقدتوا مصداقيتكوا الى كانت عند ناس كتير فى الاول .. نفس الغباء بتاع مبارك .. مش عارفة هو الغباء ده عادة فى الحكم العسكرى ولا اية ؟
لازم كل الشلة دى يا جماعة تتحاكم بتهمة ال " الغبـــاء السيـاسـى " اه والله
فى الاول انتوا تعهدتوا بحماية الثورة و تنفيذ مطالب الشعب
بقلنا 100 يوم
ايه الى اتنفذ و ايه الى اتحمى ها ؟
العادلى خد 13 سنة و جرانة 5 سنين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
هوو ده الى الناس ماتت عشانه ولا ايه ؟؟
وسوزران ترملنا 24 مليون جنية .. ايه ؟ انتوا فاكرينا ايه ؟
موضوع الظباط الى نزلوا التحرير ..
فى الاول المجلس كان رجالته علينا فى النت بصراحة قايمين بالواجب وزياده::
دول مش ظباط .. دول عايزين يوقعوا بينا و بين الجيش .. مش عارفة بيتكلموا بصيغة الجمع ليه
لو رجالة يطلعوا يقولوا هما مين
والرجالة نزلوا التحرير و نزلوا كمان بلبس الجيش
لا دول سارقين لبس الجيش و عايزين يعملوا وقيعة
وفى ناس قالت لو شوفناهم هنبلغ عنهم الشرطة العسكرية .. هاه ! ياولا
طب الراجلة وروهم بطايقهم و كارنيهاتهم واتكلموا معاهم كمان
لاءاااا دى ثورة مدنية ومحدش يبوظها الى عايز يتظاهر يتظاهر فى مكانه فى ثكناته
وشوية قالوا دول ظباط جيييش و الجيش منزلهم مابينا عشان يلاقى حجة انه يفض التظاهر
وشوية بعد المجزرة الى حصلت الجمعة بليل فجأة سبحان الله بقوا الظباط دول خونة كلهم و كلهم ليهم علاقات مشبوهة
مش حاسين ان فى عك و كدب علنى ؟؟
لا و يطلع يقولك فى البيان 34 ده كان فى فلول حزب وطنى بيعملوا وقيعة و بيروعوا المواطنين ههههههههه
ياراجل ده انت مسخررررة
لا و فلول و هما اصلا محلوش الحزب الوطنى
واحلى حاجة بقا انهم الى قبضوا عليه طلع براءة
ياخى ***
وبعدين يقولك احنا مضربناش نار حى ابدااااا
طب ياعم احنا هبل و كدابين و الفديوهات كدابه
على ماهر الى مات ده مات ازاى ؟؟
الدم الى كان مغرق الميدان ده جيه ازاى ؟ صلصة ؟
الرصاص الحى الى الناس كانت بتلمه من الشارع ده ايه موقفه ؟
والرصاص الى مخرم الحديد ده ايه ؟؟
هتقولى بقا كان فى عناصر مخربة و مندسين هقولك ***ااااااااااااااااا معذرتاً
الفديوهات مبينة كل حاجة ... عيب بقا .. عيب هاه ؟ عيييب ...
احنا كبار بردو يعنى محناش عيال .. متستهفأوناش اوى كدة .. يعنى استهفأونا بس مش للدرجة دى .. قشدة ؟؟
ده غير طبعا الكدب فى فضكوا لاعتصام .. مولوتوف و بنات و شباب و لب و سودانى و بتاع و شوفوا الفديو ده تويتو مع طلعت زكريا :D عاار وربنا
http://www.youtube.com/watch?v=g3rCA0E6EpM طبعا الشباب و الشعب الى هجموا دول هما البلطجيــــــــــــة مش كده ؟
------------
طبعا ده غير الكدب فى موضوع المحاكمات .. هو انا عايزة اسأل سؤال
انتوا قابضين على ناس ولا مش قابضين على ناس ؟؟
طيب هتقولى انتوا قبضتوا على ناس و لما اتأكدتوا من هويتهم و انهم مش بلطجية سبتوهم
طب عذبتوهم ليه فى المتحف ؟؟ حتى البلطجية ليه التعذيب والدم ده ؟؟ ايــــه مش فى قانون ؟؟
وبعدين انتوا شويه تقولوا فى بيان 45 ان مافيش حملة اعتقالات لشباب الثورة
وتقولوا فى بيان 36 و 40 انكوا هتعيدوا النظر فى محكمات اتنين ... طيب هما مطلعوش ليه ؟ و ما خفى كان اعظم طبعا
و فى بيان 50 تقولوا .... إعادة الاجراءات القانونية للمعتقلين من شباب الثورة خاصة فى مارس و ابريل !!!!!!!!!!!!!!!!!!!!!!!!!
يعنى مالآخر انتوا عندكوا معتقلين ولا معندكوش ؟؟
والنبى الى يكتب بيانات المجلس الاعلى يبقى يراجع على الى قبلهم عشان بس شكلكوا أودام الناس
وطبعا فى الاخر بقا الاتجاه كلوا لكلام الاجندات و العناصر المخربة و البلطجية الى عايزين يعملوا وقيعة بين الجيش و الشعب .....
لا يا فندم بين المجلس و الشعب .. و الوقيعة اصلا حاصلة .. من عمايلكوا .. البلطجية دول هما الى انتوا بتسيبوهم علينا و مش بتعرفوا تحمونا منهم او مش عايزين :) شكراً
-------------------------------------------
سادسا : احداث السفارة .. سفارة الكلب
يتــــــــــــــــــبع بعد قليل
..............
Comments